ОДРЖАН ПАРАОЛИМПИСКИ ЧАС ЗА СТУДЕНТИТЕ ОД ЧЕТВРТА ГОДИНА НА ФАКУЛТЕТОТ ЗА ФИЗИЧКО ОБРАЗОВАНИЕ, СПОРТ И ЗДРАВЈЕ

На 11.12.2023 година, претседателот на Параолимпискиот комитет на Северна Македонија, Бранимир Јовановски, заслужен спортист на Македонија и врвен тренер во стрелаштво, во амфитеатарот на Факултетот за физичко образование, спорт и здравје во Скопје, одржа инклузивен параолимписки час на студентите од четврта година на тема “Потребата од спорт и спортска рекреација на лицата со инвалидност, предизвици и бенефити”, во рамките на часот по рекреација кај проф. д-р Горан Никовски.

Во излагањето беа опфатени повеќе аспекти на потребата од организирана телесна вежба за лицата со најразличен вид и степен на инвалидитет, за дефиницијата на лицата со инвалидност, терминологијата што се употребува, категоризација според видот и степенот на попреченоста, дека спортот и телесната вежба не се резервирани само за здравите лица, туку дека лицата со инвалидност имаат еднаква потреба (ако не и поголема) да се бават со некоја организирана форма на физичка вежба, тренинг, спорт и спортска рекреација во обидите да го намалат ризикот од таканаречените модерни болести (стрес, дебелина, дијабетес, нервози, анксиозност, болести на срцето и крвните садови и многу други), дека за нив занимавањето со спорт и спортска рекреација претставува многу повеќе од здрава разонода, преземените активности на ова поле придонесуваат во нивното психофизичко прилагодување, во нивната победа врз сопствените чувства на помала вредност и неспособност, социјална интеграција и чувство на радост кон враќање во живот, како и сознание дека инвалидноста не значи и неспособност.

Беше дискутирано за аеробното вежбање со сите негови физиолошки карактеристики, индикатори на оптеретување (внатрешни и надворешни), и бенефитите што ги носи истото за благосостојба на организмот на физичко, психолошко и социјално поле.

Потоа за најголемите недостатоци за ефективно и ефикасно учество на лицата со инвалидност во разни форми на спорт и спортско рекреативни активности (пред се непристапни спортски објекти, недостаток на адаптиран превоз, обележан паркинг простор, недостаток на специфична спортска опрема и стручни кадри, како и недоволно финансиски средства за организирање и спроведување на овие активности).

Беа презентирани специфични ортопедски помагала (протези, ортози, инвалидски колички за разни спортови) кои ги користат спортистите со инвалидитет, а беа презентирани и повеќе врвни домашни и меѓународни спортисти, носители на медали од највисок ранг на натпревари.