ПРВО БАЛКАНСКО ПРВЕНСТВО ВО ПИНГ ПОНГ, ВРЊАЧКА БАЊА 2025

Во организација на Балканската пингпонгарска федерација, од 22-26.04.2025 година во Врњачка Бања, Србија, се одржува првото Балканско првенство во пара пинг понг на кое учествуваат 47 натпреварувачи од 5 држави: Србија, Црна Гора, Босна и Херцеговина, Северна Македонија и Бугарија.

Во составот на македонската репрезентација, според одлуката на селекторот Страшко Коцевски се натпреваруваат Игорчо Постолов во класа 6, Марјан Зафировски во класа 7, Рубинчо Ристески во класа 8 и Тони Митровски во класа 8.

Натпреварите, заради мал број на пријавени натпреварувачи, се одржуваат во споени класи 6-7 и 8-10.

На 23.04.2025 година се одржаа натпреварите по групи во поединечна конкуренција. Во класите 6-7 имаше пријавено 10 натпреварувачи кои разигруваа во три групи. Првопласираните двајца натпреварувачи од секоја група ги продолжуваат борбите во четвртфинале.

Во споената класа 6-7, Марјан Зафировски настапи во група од 3 натпреварувачи, ги загуби и двата натпревари и не ја помина групата завршувајќи на третото место во групата.

Игорчо Постолов настапи во група со 4 натпреварувачи, извојува една победа која за жал не беше доволна да ги продолжи борбите во четвртфиналето и заврши како третопласиран во својата група.

Во класата 8-10, настапија 14 натпреварувачи. Рубинчо Ристески настапи во група од 3 натпреварувачи, ги изгуби и двете борби и не ја помина групата, а Тони Митровски настапи во група со 4 натпреварувачи, ги загуби сите три дуели и исто така не ја помина групата.

За жал четвртфиналните борби ќе поминат без учество на наши натпреварувачи.

Денес претпладне нашите натпреварувачи се слободни, а на турнирот се игра четвртфинале, полуфинале и финале во поединечна конкуренција.

На 24.04.2025 година во 16:00 започнаа борбите во двојки. Беа пријавени 11 парови, од кои 1 од Бугарија, 2 од Македонија, 2 од Црна Гора и 6 од Србија.

Македонија настапи со две екипи.

Во едната настапија Рубинчо Ристески и Марјан Зафировски во група со два дубла од Србија и еден дубл од Црна Гора. Тие ги загубија сите три натпревари и ја завршија борбата на четврто место без да ја поминат групата.

Втората двојка (дубл) ја сочинуваа Игорчо Постолов и Тони Митровски кои исто така разигруваа со два дубла од Србија и еден од Црна Гора. И тие ги загубија сите натпревари во групата и со тоа заврши настапот на нашите спортисти на шампионатот.